Common Carnaval Mestreech

Common Carnaval Mestreech

Same Vastelaovend viere.

Carneval is eín vaan de krachtegste rituele die eus stad eige is.

De Mestreechter gemeinsjap koestert häör gebruke zorgvöldeg. Aw en nui tradities kinne nevenein bestoon. Die ruimte gief me hei aonein. Dat maak Mestreech ’n fijn stad um in te woene, te leve en te bezeuke. ’t Ritueel vaan carneval is opgebouwd oet miejer gebäörtenisse en samekomste vaan lui, in groeter en kleinder gróppe, in d'n aonluip nao Vastelaovend. Same carnevalspekskes make, aon de wagele bouwe, same meziek make, ete en drinke.

Motto vaan de Mestreechter Vastelaovend is verbinde door "Plezeer & Sjariteit". "Common Carnaval" ("Same vastelaovend viere") is e projek door, veur en mèt inwoeners vaan de stad Mestreech, vlöchtelinge en nuikoumers.

De vlöchtelinge höbbe neet allein hun stad, dörp of hoes mote achterlaote. Mèt hun vlöch lete ze de veurwerpe, mominte en plekke achter die vörm gaove aaon hun daogeleks leve, meh ouch de gezameleke rituele: de groete en klein fieste die mèt femilie, gróppe vrun, buurte, stei of in ’t gans land gevierd woorte.

Eíne vaan de pijlers vaan de Mestreechter Geis boe de stad Mestreech zoe gruuts op is, is de tolerante levesopvatting. Daorum wèlle veer de carneval, de veurbereiinge, d’n oetindeleken optoch en ’t viere denao es gelegeheid numme um de vlöchtelinge "welkom" te heite. Veer wèlle hun oontmoete en deil laote numme aon eus gemeinsjap.

Dit kinne veer doen door eus rituele roontelum de carneval mèt hun te deile, door hun oet te nudege um same pekskes te make, te bouwe aon objecte en ’ne wagel en hun mèt te laote loupe in d’n optoch.

Carneval viere is ’n meneer um op ’n humorvol, nuisjierege en respecvol meneer de maotsjappij en de rolle die ’n eder vervölt te bevraoge.

Veer riechte in de lijn vaan ’t carnevaleske es practical joke daan ouch ’n tijdeleke carnevalsvereineging op. ’n Vereineging mèt ’ne vlöchtelinge-prins en ’n prinses die "ein vaan us" is. De raod vaan 11 zal bestoon oet ’n aontal jong Mestreechtenere, ’n aontal jong aonkoumende kunsteneers en ’n aontal jong vlöchtelinge.

Op weeg nao zoondag 7 fibberwarie deit deze Raod vaan 11 mèt mèlden humor ’n poging um alle inwoeners vaan de stad mèt-ein te verbinde.

Ederein maag mètdoen!

"Common Carnaval", "Same Carneval", "Vastelaovend same!"

De raod vaan 11 wordt ondersteund door: Stichting Elisabeth Strouven, iArts Maastricht, Het Geluid Maastricht, Bureau Europa, Tout Maastricht, Code 043, Not Just A Number, Fashionclash, Dear Hunter, COA, Zuyd Hogeschool, Gemeente Maastricht, Stichting Kanunnik Salden, de Tempeleers, Vluchtelingenwerk, Jongerenraad Maastricht & Provincie Limburg